Донишҷӯёни лаёқатманд ба "Ҳафтаи худидоракунӣ" ҷалб шуданд
Дар толори хурди раёсати донишгоҳ дар асоси Қарори Раиси вилояти Суғд ва фармоиши ректори донишгоҳ озмуни “Ҳафтаи иштироки донишҷӯён дар идоракунии Донишгоҳи давлатии Хуҷанд ба номи академик Бобоҷон Ғафуров” гузаронида шуд.
Дар маросими ифтитоҳии озмун масъулин аз шуъба ва раёсатҳои донишгоҳ иштирок намуда доир ба ғамхориву таваҷҷуҳ ва боварии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати ҷавонон, рушди соҳаи маориф ва илм дар солҳои соҳибистиқлолии мамлакат, ҷалби ҷавонон ба вазифаҳои роҳбарикунанда ва хизмати давлатӣ ва дигар самтҳои муҳимми сиёсати давлатии ҷавонон изҳори назар намуданд.
Инчунин аз ҷониби масъулини озмун довталабон бо тартиби баргузорӣ ва ҳадафи озмун шинос карда шуда, ҳайати комиссияи озмун – аз ҳисоби раёсату шуъбаҳои донишгоҳ донишҳои тахассусӣ, сиёсию ҳуқуқӣ, сатҳи забондонӣ ва маҳорату малакаи довталабонро санҷиданд.
Дар озмун наздик 100 нафар донишҷӯёни фаъолу болаёқат иштирок намуда, беҳтаринҳо барои иштирок дар даври вилоятии озмун роҳхат гирифтанд.