Семинари илмӣ-назариявӣ бахшида ба Иди Сада

Дар кафедраи назарияи физика семинари илмӣ-назариявӣ таҳти унвони “Ҳисоб кардани равандҳои гузариш дар занҷирҳои электрии хаттӣ” баргузор гардид. Ин ҳамоиш ба Иди Сада, ки яке аз ҷашнҳои қадимии ориётаборон маҳсуб мешавад, бахшида шуда, бо иштироки ноибдекан оид ба корҳои илмӣ Таҳмина Ашӯрова, мудири кафедра Шафоат Луғмонова, устодон ва магистрантон сурат гирифт.

Семинарро мудири кафедра Шафоат Луғмонова ифтитоҳ намуда, доир ба аҳамияти Иди Сада ва нақши он дар таъриху фарҳанги тоҷикон ибрози назар кард. Зикр гардид, ки Сада рамзи рӯшноӣ, гармӣ ва оғози омодагиҳо ба корҳои кишоварзӣ мебошад.

Тибқи барномаи семинар, муаллими калони кафедра Муйдинҷон Ҳомидов дар мавзуи “Ҳисоб кардани равандҳои гузариш дар занҷирҳои электрии хаттӣ” маърӯза пешниҳод намуд. Ӯ масъалаҳои марбут ба таҳлили манбаъҳои ҷараёни электрикӣ, тартиб додани моделҳои физикӣ ва арзёбии иқтидори энергияи электрикӣ-ро мавриди баррасӣ қарор дод.

Дар ҷараёни ҳамоиш миёни иштирокчиён мубоҳисаи илмӣ сурат гирифт. Устодону магистрантон доир ба мавзуи маърӯза саволҳо пешниҳод намуда, андешаҳои худро баён карданд.

Хулоса, семинари илмӣ-назариявӣ дар сатҳи баланди илмӣ баргузор гардида, саҳми он дар ташаккули донишҳои назариявӣ ва амалӣ назаррас арзёбӣ шуд. Иштирокчиён баргузории чунин чорабиниҳоро дар пешбурди таҳқиқоти илмӣ муҳим арзёбӣ намуда, зарурати идомаи ин ташаббусро таъкид карданд.

Маркази иттилоот ва таҳлил